La Majon di Fascegn chiama ite la Gran Radunanza
Te la Gran Radunanza vegnarà portà dant ence la pruma idees per i festejaments del cedean; n bel travert caraterisà da enrescida, gaissa e condivijion per stravardèr e didèr viver e crescer l’identità , la cultura, l lengaz e la tradizions ladines.
Dai 4 ai 15 de november se podarà empienir ite n formulèr Google moduls olache ge vegn domanà a la jent de palesèr e de manèr ite idees e conscidrazions sun coche ge saessa bel che l cedean vegne recordà e festejà . L formulèr sarà dat fora sui canai social Facebook e Instagram de la Majon di Fascegn, metù sul sit istituzionèl del ent www.istladin.net, e l sarà ence a la leta sun papier te senta del Istitut.
Sarà n apuntament emportant per portèr dant la sacotanta ativitèdes del Istitut, del Museo e de la Biblioteca e olache, tres n percors gustegol e desvalif compagnà dai dependents del ent, la jent podarà cognoscer la ativitèdes e dir la sia, portan dant consees, pensieres, idees e, perché pa no, ence critiches costrutives. Filmac, postazions de lurier da proèr e veder per entener che che sozede tedò la coltrines del Tobià de Pieif e te Museo che, enceben che l reste serà per lurieres per la sajon da d’invern, no l lasciarà su de sporjer sia ativitèdes didatiches e de endrezèr neva scomenzadives.
L 50eisem cedean cognessa esser dassen spezièl e condividù con duc chi che a volù l Istitut, con chi che à lurà e colaborà , co la jent de Fascia e ence co la jent che vegn da foradecà o che da foradecà à sostegnù chesta istituzion. Enc publics o sogec privac, scoles e scolines, istituzions, sociazions, families, ghesć, artisć, artejegn boteghieres, operatores turistics, giaves, joegn e chi à gust e gaissa podarà dir la sia e scriver ite.
I resultac de chesta scomezadiva vegnarà descorec fora endèna la Gran Radunanza, olache ensema sarà metù ju l program di festejaments del 50eisem. “Ve speton donca de n muie e ve envion a manèr ite voscia idees per ge fèr festa al Istitut, ajache la Majon di Fascegn l é ence voscia majon!”, la engaissa la diretora del ent, Sabrina Rasom.
Informazions sun www.istladin.net/ld/radunanza2024
La versione in lingua italiana di questo articolo è stata pubblicata nei giorni scorsi qui su UT24
