En Trea’t keart de presidenz van ARGE ALP 2024-2025
Va de 25 van schanmikeal 2024 finz as de 24 van schanmikeal 2025 de autonome Provinz va Trea’t bart hom de presidenz van ARGE ALP, de òrbetgamoa’schòft van alpine region. Za kriang der kuntschòft van Canton Ticino, pet a Zerimonia ka de Gottardo Arena va Ambrì, en de region va de Leventina, zirka 50 kilometer keing nord va Bellizona, de vicepresident va de Autonome Provinz va Trea’t Francesca Gerosa, zòmm pet en viarer van Dinst ver de Sprochminderhaitn ont de ausbendegen nètzn Elisabetta Sovilla.
Bail en trèff ist kemmen vourstellt de regiarung auslònt van bolf van an studio van Land Tirol gahenk en an vurm za mòchen s aus Arge Alp van 2022. No za hom vourstellt der studio hòt ganommen s bourt de vicepresident Gerosa, as hòt pfrok za nemmen vour nèt lai der bolf ober gor de pern en de regionen as de alpn, asou as gor s doi kimmp bourganommen van alpneirter. “Ver sèll as keart s pferlech van bolf s ist an tema as men miast nèt sai long bavai de problemen sai’ en Trentin aa ont en òndra lander aa, lander as kemmen hait vourtrong” hòt klòfft de Gerosa.
“I hon pfrok za baitern s pakimmern se van Arge Alp en sèll as keart der per aa, bavai i denk as de noat ist za sai’ òlla zomm abia alpn lander ver za zòmmòrbetn ont kròft hom en Europa as en doi argoment ver za tschbinnen en projektn zòmm”, hòt derzelt de vicepresidenten.
De vourstea’ner va de regiar va ARGE ALP, en riven va de konferenz hom untertschrim zboa risoluzionen. De earste no sèll as ist kemmen tscherlt va de presidenz van Canton Ticino 2023/2024, s hòt keart en de sèlber regiar van bòsser, burzelement ver za derhòltn en de long zait s lem va de alpn birtschòft. Der tèckst unterstraicht s bichte za envire trong s kennenschòft ont sèll as men tuat zbischn de region van alpn ont de noat za vourtrong naia ideen. En an moment zoagt van bècksln van klima, der zil as men hòt ver lonka zaitn ist vinnen virm ver za meing prauchen praktesch ver za gem de moglechkait en de lander en a noat za meing pahenn tea’.
De zboate risoluzion aa klòfft van klima: der tema ist as de zòmmòrbet ver benn as hòt noat no de schlèchtn bètter oder en naturaln aukeareta passiarn. De risoluzion schauk za vinnen de zòmm strategi ver za nidern s riskiarn en de lander van alpn ont schaun za zòmm mithelven as schelltn kemmen praucht a toal aupassn za tea’.
Der Zòmmtrèff van Stòtt Viarer van ARGE ALP hòt aa u’ganommen abia as de tschbinnts iber de Strategi macroregional ver de alpine region (EUSALP) va de europeische Union. S ist kemmen unterstraicht de noat za versterchern de bichtekait va de politische Strategi: ver dòs de ARGE ALP regionen belln as schellt kemmen u’gaheift a politische zòmmklòff ver za leing se oa’ne ver bos za trong envire en de zukunft.
Zan leistn van Zòmmtrèff van Stòtt Viarer, hòt se s vaiern van praisasugem van Premi ARGE ALP 2024 gahòlten: de internazionalschatzgruppe hòt 19 projektn tschatzt as pet en aushòltlegregiar van bòsser za tea’ hom, ont s hom drai lait gabungen.
Der earste prais ist en de Scuola Specializzata Superiore di Tecnica (SSST) va Bellinzona gòngen, ver en projekt va vèrrregiar van bòsserausgem en de prinn; der zboate prais ist gòngen en de lombard Gargano ADV, ver en projekt “AquaGuardi – Der Digitaldrauschauer van Bòsser”; der dritte prais ist gòngen en de Südtiroler Bauernbund, ver en projekt “Wasser Pilot – Verpesser van bassern en de bisnbirtschòft, pauerbirtschòft, fruchtbirtschòft ont bai’merbirtschòft”.
Ibersetz gamòcht van Sprochtirl va de Tolgamoa’schòft Hoa Valzegu’ ont Bersntol
La versione dell’articolo in lingua italiana è stata pubblicata nei giorni scorsi su UT24
