Monc de pèsc – VIDEO
A scomenzèr da la fin de mèrz, la Mostra – Museo „1914-1918 LA GRAN VERA – Galizia Dolomiti“ de Moena met dant n nef video che, col moscèr i grieves egn de vera su la Dolomites, l vel portèr dant endodanef l messaje de pèsc e de respet che à compagnà la ideazion de la mostra pean via dal 2014.
L Comun General de Fascia e l Istitut Cultural Ladin Majon di fascegn, col didament de la Region Trentin Sudtirol, i à volù recordèr l diejem cedean de la mostra-museo de la Gran Vera te n filmat dal titol evocatif “Monc de pèsc – Montagne di Pace”, per sotrissèr che l é amò gran besegn de se fermèr a pissèr a che che l é stat. Tegnir a ment, defat, l é n doer prezis, ajache gran desgrazies desche chela che à tocià tel fon del cher duta la jent de la Dolomites, les é semper atuèles.
L test fon e prezis scrit da Silvia Murer, dessema co la scenes da gran emozion toutes ju dal regist Fulvio Demartin Pinter, enterza stories e memories, l temp passà col temp daldidanché e l passa fora la sales espojitive per se n arloèr sui troes de vera, sporjan neves ponc de veduda e de reflescion. Ades, chest nef filmat fèsc pèrt del percors de vijita a Moena e se pel l troèr ence online, te più lengac, per esser amò più percacent tel slarièr fora sie messaje universèl.
Tras chest video vegn portà dant manaman la rejons che à fat nascer la mostra, l empegn fon di curatores e la pascion de duc chi che à colaborà e amò ades dèsc na man, a partir dai volontadives de la sociazion storica “Sul Fronte dei Ricordi”. Da sacontenc de egn chisc volontadives, con sie lurier, i rencurea i troes storics e i met en segureza la postazions de vera su per la crepes. Ogne vijitador, del post o da foradecà, tras chisc segnes concrec l enten delvers che duta la veres no les é auter che na desfata e che chisc monc, con segné desche l om da ferides e sfrijons, se à vadagnà nosc stravardament e nosc più gran respet.
La fadia di sudé te la trincees, i padimenc de la jent ti paijes e soraldut la dificoltèdes zenza fin a cheles che à cognù ge fèr front la popolazion ladina, trentina e tiroleisa sui spic de la Dolomites, i met al luster l fon leam anter om e ambient. N leam che rejona anchecondì de endesfides e de dolor, purampò ence de consolazion e de pèsc, che l é i fondamenc più preziousc per smaorèr l recort de ogneun e ge dèr forza, e per meter a jir n davegnir de responsaboltà e de toleranza.
La mostra „LA GRAN VERA“ la é nasciuda da la colaborazion anter l Comun de Moena, la Majon di Fascegn, l Comun General de Fascia e la sociazion “Sul Fronte dei Ricordi”. La mostra te chisc diesc egn l’à desmostrà de esser un di ponc de orgolie e de maor valuta te la perferida culturèla no demò de la val, ma de duta la region e, an dò an, la seghita a soscedèr gran enteres da man de enrescidores e pascioné e de n miue de jent. La mostra – museo, endèna che rue a una l projet de la fèr doventèr na sezion stabola del Museo Ladin de Fascia, la seghita a esser viventèda da neves picoi alestimenc e da reperc de enteres, che ge dèsc semper più luster a chest emportant capitol de storia.
La versione in lingua italiana di questo articolo è stata pubblicata nei giorni scorsi su UT24
