Di djungen khennen di alpinar redjongen
Vo Tria atz Innsbruck un sin auz in di Svaitz, pasarante durch München in Bavìara un dena atz Lione un bidrùmm, durch Milån: disar iz lai ummadar von viazan boma mage machan pittnan uantzegen zettln Iterrail, boda zuargitt zo riva in 33 State un 30.000 stattn un lentar pittnan uantzegen aisanpån pass, viazarante durch di alpinar redjongen. Pinn prodjèkt Youth Alpine Interrail (Yoalin) vodar internatzionàl Komisiong zo Schütza di Alpm (CIPRA) di djungen zbisnen in 18 un in 27 djar mang gebinnen 150 Interrail Pass zo nütza auz pan summar 2025: sintzekh vo disan zettln soin hintargehaltet vor Arge Alp, da arbat Kmòuschaft boda lekk panåndar zen alpinar redjongen. ’Z zil iz daz sèll zo macha gevalln mearar di öffentleschen traspòrte un schupfan zo viazara haltante kunt ke ma mocht schoanen di umbèlt un ke ditza tarft khemmen gelirnt sin vo djüngom au.
Zo maga gebinnen di zettln iz genumma rispundarn atz ainfachege vorsch boma vennt afte websait www.yoalin.org von 2 von abrèl vort, sin atz 15 von madjo 2025. Ma bart machan a “reklåm early bird”, boda bartn khemmen gezoget 50 zettln zbisnen alln in sèlln bodase bartn innschraim vor atz 21 von abrèl 2025. Berda gebinnt bart khemmen gerüaft zo nemma toal atz mearare evente in mearare alpinar redjongen nå in prodjèkt boda iz khent augelekk.
Berda viazart pitt Yoalin bart mang nemmen toal dar nètz un stian pittnåndar in okasiong vodar öffnung von prodjèkt bodase bart haltn in di tang von 14 sin atz 16 von prachant atz Poschiavo in di Svaitz un in åndre trèff bodase bartn haltn hèrta in di lentar von Alpm. Darzuar bartnsa khemmen geschupf auzokontàra soine esperientzan pitt foto un tagepuachan, gebante asó a hånt zo pezzra no mearar in prodjèkt. Di pestn esperientzan bartn nemmen toal in an konkurs un barten khemmen zuargètt a prais in an event bodase bart haltn von 24 sin atz 26 von bimmat 2025 in Berna. Zen toalnemmar von redjongen Arge Alp, darzuar, bartn mang kontàrn soine esperiantzan in djarege Forum Eusalp atz 25 von bintmånat 2025 atz Innsbruck.
Di toalnemmar mang håm nützliche empflung vor di viazan bosa bölln machan vodar community von sèlln boda sa håm viazar pitt Yaolin, boda darzuar mangse vüarn z’sega di sachandarn in zèrte redjongen un zo bizzasan mearar iz genumma gian afte websait sito https://www.yoalin.org/ .
Yaolin iz an initziatìf vodar Internatzionàl Komisiong zo Schütza di Alpm un von soin konsultìf Rat von djungen boda au iz sidar ’z djar 2018. Darzuar Arge Alp, dar prodjèkt iz finantzièll augehaltet vodar Konventzion von Alpm in di Svaitz un in Österraich un vodar Stiftung Klima Now. Arge Alp hatt sa gehatt genump toal in prodjekt in di djar 2021 un 2022. Di öffnung vo Yaolin izzese gehaltet atz Landeck balda soin khent gevairt di 50 djar sidar azta iz khent augelekk Arge Alp ’z djar 2022.
Übarsetzt von Schaltarle vor di zung von Toalkamou vodar Zimbar Hoachebene. La versione in lingua italiana di questo articolo è stata pubblicata nei giorni scorsi su UT24
