Una Terra, cinque Lingue: Akadèmia von Euregio 2025
Ren übar bia zo leba afte pèrng, von alpinar habitat un von klima bèkslom, khennen di grünt von Euregio un nemmen toal in Forum vo Alpbach: dise un vil åndre okasiongen opfarta di Akadèmia von Euregio 2025. Dar formatziong mangda nemmen toal di djungen boda håm zbisnen in 18 un in 35 djar un boda håm lust zo bizzasan mearar übar in sèll boda tüat dar Euregio un in da gelaichege zait khennense pezzar tra de se o.
Di draitzekh toalnemmar bartn drau ren aftz bia ’z lem afte Alpm iz nå zo bèksla hèrta bahémmegar: di zaitn, saiz di sèlln kheltar, saiz di sèlln bermar håm hèrta gesbert starch saiz afte lentar, saiz afte låntbichtschaft. In di lestn djar iz khent hèrta bermar un ditza khint vür hèrta mearar bahemmegar, peng in klima bèkslom boda niamat mear mage abestraitn. Aftz dise tème, di djungen bartnse vennen zo reda vor drai bochentn zo khenna pezzar in Euregio sèlbart un soine struktùrn un darzuar drauren pitt laüt bodasen drinndarkhennen un åndre boda soin gekhennt.
Vo Rovrait atz Alpbach durch Poatzan
Dar earst Treff vodar Akadèmia bartze haltn ka Rovrait von 23 sin atz 25 von madjo. Pittnåndar pittar Stiftung Degasperi, bartma nåsüachan bia di lentar boda soin gelebet von khnöpf von zungmindarhaitn von Euregio soinse vürgetrakk un bia da soin gest guat mittzoleba pinn åndarn in di djarhundart.
Dar zboate trèff bartze haltn in Südtiról von 4 sin atz 6 von höbiat: ka Poatzan di djungen bartn arbatn pittnåndar pinn südtirolar Institùtt Eurac Research nåzosüacha übar in klima von drai lentar von Euregio un in klima bèkslom boda vürkhint afte Alpm. Ma bart o ren vo zungmindarhaitn un vo autonomì in Südtiról.
Dar lest trèff bartze haltn von 16 sin atz 18 von agósto in di tang von Euregio Days in européan Forum vo Alpbach 2025 drinn in tirolar “Lånt von übarlegar”. Ma bart ren mearar baz åndarst vo bia di ziln vonar kompetitìf Euròpa un dar schütz von klima bartn sbern afte alpinar lentar.
Ma makse innschraim dar Akedèmia von Euregio 2025 sin atz 27 von abrèl 2025 durch dar websait von Euregio www.euregio.info/academy . Zo nemma toal in alln in trèff, drinn pitt geèzza un herbege, bartma mochan zaln 90 euro. Zo nemma toal iz grüntlisch khånen taütsch un beles (daz mindarste stèpfl B1) un an khurtzan schraib boma khött ombrómm ma bill nemmen toal.
Übarsetzt von Schaltarle vor di zung von Toalkamou vodar Zimbar Hoachebene
La versione in lingua italiana di questo articolo è stata pubblicata nei giorni scorsi su UT24
