“Catina Pezzé Batesta e Bepi Felicetti Zompin”
Dopie apuntament, ai 11 de jené da les 20.30 e ai 12 de jené da les 16.00, che la biblioteca del Istitut Cultural Ladin ge sporc a duta la comunanza fascèna, aló da la La Gran Ciasa a Soraga, co la prejentazion del nef liber bilingue (ladin-talian) de la regoeta “Jent de Fascia” e co la raprejentazion de teater per ladin “Do l vièl del saer”.
Duc doi i apuntaments i é dediché a Catina Pezzé Batesta e Bepi Felicetti Zompin, doi persones simbol del temp de la Gran Vera te Fascia.
L liber l é stat scrit da la responsabola de la biblioteca del Istitut Cultural Ladin, Alberta Rossi, enveze la traduzion per ladin la é de la diretora Sabrina Rasom.
A ne contèr del liber l é Alberta Rossi, responsabola del projet: «L lurier per chest liber l é stat n muie particolèr ence perché laite conte più stories: l é la storia de n paisc ladin, Moena; l é la storia de la Gran Vera, event che à straout la vita ence de la valèdes ladines; e l é la storia de Catina e Bepi. Catina l é na joena de doudesc egn che vif la vera te familia e che veit mudèr sia vita de duc i dis, l paisc e che soraldut la sperimenta de persona l cumià, la mort, l dejèje e l turbament de na vita ferida da la vera, enveze Bepi l é n joen de dejesset egn, che vif la vera enveze da sudà, sui crepes de cèsa, sun Boce, olache l vegn metù dedant a na realtà cruva, che no se pel nence se fegurèr, olache l risia la vita, l padesc la fam e l freit e olache l veit morir compagnes e conscric. La ilustrazions les é de la joena artista de Pancià, Consuelo Bonet, a chela che ge é stat dat da fèr n studie spezifich per realisèr e proponer te na viesta grafica i doi personajes. Ge tegne a dir amò apede che l liber l vegn fora da n lurier condividù, che à tout ite dant de dut sia families. Rengrazie dassen de cher duc chi che i à colaborà».
Sabrina Rasom, diretora del Istitut Ladin, la recorda che «Da chesta narazion piena de emozion e sentiment, vèlch outa zis forc da no poder prest esser soporté, vegn fora valores fons de fe e de amor per la vita e forza de scomenzèr semper endodanef. Vegn fora amò apede l besegn de crescer, cognoscer, saer e studièr e amò, vegn fora l besegn de no lascèr mai esser e de no perder mai la gaissa. N auter picol toch de storia de Fascia, donca, sport a na vida lijiera e scempia per esser entenù da duc: desche argoment da cognoscer, ma ence e soraldut desche insegnament per no desmentièr».
Do la prejentazion del liber se podarà veder la raprejentazion de teater per ladin dal titol “Do l vièl del saer – Catina Pezzé Batesta e Bepi Felicetti Zompin vel te dir vèlch” jà portèda dant de november alalèrgia a Moena” e che à abù n gran ejit.
Autora e regista del test l é Ilaria Chiocchetti da Moena: «Per scriver l test é durà ence la intervista video a Bepi Zompin che l é te Archivie de la biblioteca del Istitut Cultural Ladin e l liber “Piccolo diario di Caterina. 1912-1918: dalla pace alla grande guerra”, diarie scrit da ela enstessa endèna la vera e publicà del 1995 dal Grop Ladin da Moena. N lurier che dalbon me à engaissà».
