Dar Kulturinstitut Lusérn bokhennt soine laüt
Dar tage von Lusérnar Boinichtn, atz 21 von Kristmånat, iz gest an okkasióng zo lüsna bazta iz khent vürgetrakk haür von Kulturinstitut Lusérn, zo reda alle pittnåndar vodar lusérnar zung un kultur un auzolesa naüge idée von laüt un von feròine. Disar momént iz o gest dar earst trèff, vürgelekk von statùt, vodar Monica Pedrazza, sidar madjo vo haür vorsitzaren von Kulturinstitut: “Di sachandar zo tüana – hatze khött – soin vil. Åzoheva, azbar bölln übarlem, iz gåntz bichte übarnemmen di rolle vo zungmindarhait, nemmante bidar in platz bodaz zuarsteat. Bar soin getoalt in zboan: attna sait, pròpio vor ünsar zung, saibar fondamént vor di autonomì vo Tria, atta åndar a lentle atti grentz, a platz vo kriage un gedenkha.
Vor ditza, azpe gezoaget in trèff von Lusérnar Boinichtn, barta soin gåntz bichte dar Museo Lusérn “Dar Museo pitt soin pildarn von Earst Beltkriage, ‘z Haus von Prükk, di Pinakothek Rheo Martin Pedrazza un dar Werk Lusérn håm an groazan bèrt, bobar biar mochan lai machan khennen un schètzan in da gåntz Redjóng”. Disan summar meara baz 10.000 laüt soin khent z’sega di auzlegom, ‘z izta khent gestemplt dar naüge Herbarium, gebortet vodar auzlegom “Billz gegrés un biar – An Herbarium vor Lusérn” un vor ‘z djar 2025 barta khemmen boróatet a naüga, gehoazt “Khlummane vichela un biar”. ‘Z barta sichar o soin da sèll, boda khint gebèkhslt alle djar, haür pinn titl “BURTZAN. Stòrdje vo baibar, arbat un pèrge”, boda aukontart von starchan baibarn vo Lusérn von zbuantzekhste djarthundart.
Dar Kulturinstitut geat vürsnen auzohalta di zung: Dar prodjekt “Khlummane lustege tritt”, da “Zimbar Kolonia” un dar “Summar Khindargart” untarstützan da zimbarzung übarallz zbisnen in naün djeneratziongen. Pitt “Di Sait vo Lusérn”, boda auzgeat attn foldjo l’Adige, “Zimbar Earde” un “Dar Fòldjo”, gestemplt alln sèks månat, makma lesan un lüsnen lusérnaresch un bizzan bazta ågeat ünsar zungmindarhait. “Zo haba gesek ke sovl laüt soinse ingeschribet in earst stèpfl von kurs vodar zimbarzung – khütta di V alentina von Kastelé – izta khent gemacht dar stèpfl A2 pitt 40 letzióneng un 190 übungen: Ma magen machan sèlbart vo da huam, gianante atti websait von Kulturinstitut. ‘Z håmda o vill gevallt di “Splittarla”: kurze video pitt darnå a khurtza übung, bodaz lirnen eppaz azpe biar”. Di kürs, boda khemmen gevoalt, soin ettlane: Dar kurs zo lirna lusérnaresch un taütsch in Kulturinstitut, dar kurs von gekhnöppla un vürsnen pittar untarstützung von schualn un von studjént, boda bölln ren von zungmindarhaitn, dar simposio “In Hèrtz von Holtz” un di arbat pittnåndar pinn Komitàt von taütschan zungmindarhaitn in Beleschlånt.
“Vor in Kulturinstitut Lusérn iz gåntz bichte – asó di Vorsitzaren Pedrazza – arbatn pittnåndar pinn laüt un pinn feròine, boda soin atz Lusérn: i khü Vorgèllzgott zo saiba khent alln. A bichtegez sachan bode böllat iz azta di laüt von lånt schètzan in Kulturinstitut, azpe eppaz guatz vor ünsar zung”. ‘
La versione in lingua italiana di questo articolo è stata pubblicata nei giorni scorsi qui su UT24
