Ciampedel coleà a la fibra otica
Via per de november, la rei publica de fibra otica la é ruèda tel Comun de Ciampedel e a 1.069 fabricac neves. Chest l lo à fat a saer Open Fiber, la sozietà che tel Trentin la é stata enciarièda del Projet Banda Ultra Lèria (BUL), che à l fin de enjignèr la rei publica per la fibra otica te la arees biences (periferies), olache i operadores privac no fèsc investimenc.
De gra al sparpagnament de la rei te Fascia, i Comuns trentins che pel se spener co la tecnologia de valuta Ftth (Fixed To The Home) i doventa 155, enveze l raion che pel se emprevaler de Ftth e Fwa (Fixed Wireless Access) l tol ite 157 Comuns su 166 en dut. L coleament Ftth l é conscidrà la mior soluzion sul marcià per stabilità e velozità , ajache l dèsc l met de meter a la leta la fibra otica per la cèses di utenc. I pec coleamenc, fac per i raions più isolé e senestres da ge ruèr apede, i vegn enjigné co la teconologia radio FWE (Fixed Wireless Access) che, te ogne cajo, la dèsc l met de se emprevaler de la banda ultra lèria.
Per l Projet Bul, portà inant da Infratel e metù a jir tel Trentin da Open Fiber, à colaborà la Provinzia Autonoma de Trent e Trentino Digitale. La sozietà publica de sistem l’à metù a la leta vèlch infrastrutura, per ejempie la tubazions, che à dat l met de smendrèr i cosć e i tempes de realisazion de la rei publica.
Per meter a jir la conescion ultra spedienta, i enciasé di Comuns neves che i à la leta l coleament, bèsta che i ge vae do a na prozedura scempia:
- Verifichèr che sie numer zivich sie corì da Open Fiber;
- Cerner l operador anter chi che l é a la leta e l pian de tarifa;
- Manèr ite la domana de ativazion al fornidor cernù fora.
I utenc trentins pel troèr l servije de assistenza de Open Fiber sun chesta direzion: https://openfiber.it/contattaci/  .
Se pel aer informazions più avisa dintornvia l sparpagnament de la fibra otica tel Trentin, sul portal metù a la leta da Trentino Digitale: www.trentinoinrete.it  .
De gra al coleament de Ciampedel, l Trentin seghita a se miorèr en cont de servijes digitèi, col ge sporjer a la comunanzes dal post n coleament inovatif per families e firmes.
Traduzion di Servijes Linguistics e Culturèi del Comun general de Fascia
La versione in lingua italiana di questo articolo è stata pubblicata nei giorni scorsi qui su UT24
