La Majon di Fascegn fèsc bogn i conscric del 2006

En sabeda ai 14 de dezember, da les 8 da sera, te sala Grana del Istitut Cultural Ladin a Sèn Jan se binarà i conscric del 2006 per n apuntament gustegol e foradeanter. Da 3 egn en ca la Majon di Fascegn la envia i bec de la val che fèsc i 18 egn a n apuntament semper desvalif per ge dir n gran bel detelpai percheche i porta inant na tradizion veiora con gaissa e fantasia, col recordèr l passà ma con elements neves e originèi.  Apontin chi elements che lascia che l’identità ladina no reste serèda te Museo ma la vae fora, inant, su la strèda del davegnir e del fèr comunanza.

E coluna él pa donca la proponeta de chest an portèda dant con gaissa da la neva presidenta del ent Tea Dezulian? Dotrei ores en compagnia di camaric e de la camarites del Grop de folclor de Cianacei per emparèr a balèr chi bai tradizionèi che amò se veit fora per festes e tendons, olache i joegn, e ben segur soraldut i conscric, se bina per fèr festa.

Con proponetes fora e fora semper desvalives la cèsa di ladins se dèsc ju per ge sporjer a chisc joegn l met de cognoscer la rejons de chesta usanza: ciapie da fiores, cordeles, piumes e voa de stèr adum che da generazions vegn inant. Simboi che fosc à perdù tel temp sie prum segnificat, ma che i vegn duré amò anchecondì da joegn stolc de esser pèrt de chesta comunanza.

Na cercia de tradizion che porta endò a canche se balèa, zacan, fora per chesta stues: la Majon di Fascegn doventa donca na stua, ciauda e averta, cuna no demò del passà e de fotografies veiores di conscric da zacan, ma vertia a tor ite i conscric d’aldidanché.

A tor dant i conscric sarà ence la istituzions del teritorie che ensema col Istitut ge darà l benvegnù ofizièl: l Comun general de Fascia per na bela acolienza tel mond sozioistituzionèl e la Coprativa de Fascia per i tor dant simbolicamenter del mond economich e de la cooperazion, chesta ultima valor tant fon te la comunanza ladina apede a chel de la sociazions culturèles e de folclor.

Donca ve speton de n muie conscric de Fascia e chi che volarà esser a chest bel moment.