Una Terra … cinque Lingue: Trentinar vorsitzarung vo Arge Alp
Ånemmante atz 25 von vorgånnate bimmant di vorsitzarung vo Arge Alp in vuaz von Kanton Tessin, da autonome Provìntz vo Tria mocht est nidarleng in progråmm un vürvüarn di istitutzionàln sachandarn boda ågian dar arbar Kamòuschaft von alpinar redjogen, ditza sin azta di vorsitzarung bart khemmen abegèttt in Lant Vorarlberg, vorgelekk in okasiong vodar 56^ Konferéntz von Schaffar von Govèrne bodase bart haltn ka Tria auz di lestn von bimmat von djar 2025.
Pittnan provediment ågenump atz 22 von bintmånat vügelekk von vorsitzar Maurizio Fugatti, da provintziàl Djunta hatt nidargelekk baz ’z mochta khemmen getånt auz pa disan djar boda iz khent zuargètt di vorsitzarung, daz earst vo alln untarlegantese vürzovüara in tèma “Djunge un pèrng: prodjèkte zo leba, zo arbata, auzolega arbat. Esperientzan un bia zo halta hert”.
“In dise zaitn boda soin drå zo bèksla vil sachandarn in di lentar von alpinar raum, saiz vor bazta ågeat dar umbèlt saiz vor bazta ågeat in laüt, bölbar gem vèrt in prodjèkte vo berda lebet in di lentar von pèrng un zornìrt di pèrng, ombrómm höarn un vorstian di esperientzan von åndarn mage o helvan zo “lokha” di djungen zo leba afte pèrng” asó hatta khött dar Fugatti, mechante ke dar koordinamént von Trentino aftz sött sbere problème un boda soin gelaich vor di åndarn redjongen vo Arge Alp o, boda håm khennzaichen boden gelaichan, mage helvan zo tüana guatz vor di lentar.
Sidar ’z djar 1972 da autonome Provìntz vo Tria iz toal vo Arge Alp, an arbat Kamòuschaft von Alpinar Redjongen boda hatt ’z zil zo helva auzzomacha di problème boda soin gelaich in mearare redjongen von alpinar raum helvantase ummaz pinn åndar. Haüt soinda toal vo Arge Alp di Lander Vorarlberg, Tiról un Salzburg, dar Frai Staat vodar Baviara, di autonome Provintzan vo Tria un Poatzan un di Redjong Lombardia, di Kantöü Graubünden, Sakt Gallen un Tessin.
Asó azpe da schafft dar Statùtt vodar kamòuschaft, di toalnemmar vo Arge Alp nemmen å di vorsitzarung aniaglaz vor a djar nå in alfabèt ordnung.
Pittar delibera ågenump atz 22 von bintmånat di Djunta, darzuar in tèma vodar trentinar vorsitzarung, hatt geschaft in Dianst vor di Zungmindarhaitn un auzantn sachandarn zo tüana allz bazta ågeat dar organizatziong auz pan djar; dar Dianst sèlbart bart machan in progråmm, bart herrichtn di trèff von vorsitzarung Åmt, vodar Konferentz von schaffar von govèrno, von direktìf Komitàtt, von khnopf vor di öffentleschen relatziongen, von khnöpf prodjèkte, von Praiz Arge Alp 2025 un vo alle di åndarn istitutzionàln sachandarn boda bartn khemmen getånt vodase vür sin in bimmat von djar 2025.
Vor bazta ågeat informatziong un komunikatziong, dar provedimént schafft in vüarar von Prèss Åmt vodar Provìntz nåzostiana allz in sèll boda iz zo tüana vor ditza, nå in plån vor di komunikatziong von djar vodar vorsitzarung, legantese pittnådar pinn Khnopf von öffentlechen relatziongen vo Arge Alp.
Übarsetzt von Schaltarle vor di zung von Toalkamou vodar Zimbar Hoachebene
La versione in lingua italiana di questo articolo è stata pubblicata nei giorni scorsi su UT24
