En Europeische Forum va Alpach de artifizial intelligenz
En To van Tirol, as der se en sunta af de 18 van agest kan Europeische Forum va Alpach (EFA) gahòltn hòt, ist klòfft kemmen va bos as trong hòt de artifizial intelligenz (AI). No de innbaich ont en vaiertrèff pet en president van Euregio ont va de Autonome Provinz va Poazn, Arno Kompatscher, der kapitan van Tirol, Anton Mattle, der president va de Autonome Provinz va Trea’t Maurizio Fugatti ont der president van EFA Andreas Treichl, ist kemmen der Euregio Summit kan Kongresszentrum va Alpach. De auskennlait hom diskutiart va etisn temen, va sicherkait ont van effekt avn zòmmlem ont va abia as de AI praucht kemmen mu en de òllgamoa’amministrazionen.
Òlla moa’n s glaiche: de AI hòt schoa’ iaz an konkretn effèkt iber de gamoa’schòft, de birtschòft ont de etik. De derstellt a moglechkait ver en Euregio, ober de miast kritesch tschatzt kemmen ont trong kemmen keing an rèchtn rif pet en nogea’ en auskennlait ont en de internazional standard.
“De artifizial intelligenz mu u’ganommen kemmen pet an groasn kummer oder pet echtn vrait. Der peiste be ist en de mitt”, hòt tsòk Kompatscher. “De AI mu s inser lem verpessern ont problemen ausleischn as men nou nèt kennt. Tea’ lai song “ber barn sechen” meichet ober pfèrlech sai’ avai de kòlt logik va de AI lòk nèt plòtz en de kompromessn. Ber miasn anoleing klora richtungen ont de mentschleche sait nia vergèssn”.
Der president Fugatti en sai’ gruas hòt unterstrichen as en Alpbach “tuat men klòffen va tròcht ont vernaiekait ont de temen klòffen va oa’nekait en inger lont”. Iber en tema van trèff van sèll to der president hòt tsòk: “Abia an iata naiekait de artifizial intelligenz trok mit vrogn va mearer schòrt, moglechkaitn ont pfèrlechkaitn, ont ver za verstea’ sa am peistn, an iatn van ins – stòttkearn, bèrkn, òllgamoa’amministrazionen – ist gariaft za kennen sa ont za verstea’ sa. En Trentin de untersuach iber en de AI ist vour viarsk jor u’pfònk, hinten a groasa bett as hait va de Fondazion Bruno Kessler envirtrong kimmp, asou za kemmen araus abia eppes va konkret as dinst gem en de bèlt va de lòntschòft ont van bèrkn. I pin gabiss as de inger lont, krefteg van sai’na kompetenzn, barn arausnemmen kennen de moglechkait as de doi naikait en de mentschhait trok ont barn schaung en de zukunft pet a naia lust”.
Der kapitan Mattle hòt gadenk as “ver za mòchen sicher der prauch va de AI men miast vourhòlten etische gadenk ont van zòmmlem ont men miast de mogleche problemen vinnen. Ober men miast der korasch aa hom za òrmen de doi nai technologi, as plaim bart ont nèt verschbinden, ont za prauchen sa ver de insern neat”.
