Z khearta dar trèff von hültzran skultùrn “In hèrtz von holtz”

Gem vèrt in tradiztiongen von zimbar folk, gem a naügez lem in holtz boda zi khent umgemèkket von birbl Vaia un vornaügarn pitt viar naüge kunstarbatn di staing vo Lusérn. Vo da khinta auz da draite editziong von trèff von hültzran skultùrn  “In Hèrtz von holtz”,  bodase bart haltn atz Lusérn åhevante von erta atz 25 un boda bart innhaltn sin an sunta atz 30 von prachant 2024. Dar initziatìf, augelekk von Kulturinstitut Lusérn pittar hilfe vodar Redjong Trentino-Südtiról, Alpe Cimbra un von Toalkamòu vodar Zimbar Hoachebene, bartnda nemmen toal vünft holtzsnitzlar, zornìrt vonar komisiong augelekk lai vor ditza, bodase hatt auzgenump zbisnen zbölf kandidètt.

Vo di zene mòrgas sin mittartage un vo di zboa sin di vünve in tages (un spetar o) bartma mang seng dise kunstlar boda snitzln in holtz nå in tèma: arbatn vo dise djar un khlummaz un groazez gebìllt  vodar hoachebene.

“Dòpo az iz gånt gåntz garècht in di vorgånnatn djar – asó hattaz khött dar Fiorenzo Nicolussi Castellan, kultùr mittarbatar von Kulturinstitut – vor haür habar zornìrt zo macha verte in staige von långez. Disar iz dar khürtzarste staige vo alln, pitt soin 2,6 kilòmetre un soine khnöttan maürla garade obar ’z Astetal, boda loaft auz nå in krötz untar ’z lånt un kontàrt von altn arbatn von zimbarn, “Zymmerman”, daz sèll bairesche folk boda iz gerìft afte Hoachebene di earstn djar von XI djarhundart un iz khent asó khött ombrómm soine månnen håm gearbatet ’z holtz.
Darzuar in manèkkar un dar khnöpplaren boda soin khent gemacht auz pan djar 2023, ummana von skultùrn boda bartn khemmen gemacht haür bartz soin dar paigezüglar. Åndre kunstlar, anvétze, bartn snitzln di khlumman vichela von balt, di åmazan, di snèkkn, di paing un in ekklstortz boda lebet lai in an uantzegen platz, da nåmp in Asstal.
Dise lestn skultùrn bartn khemmen gelekk auz nå in staige “Nå in tritt von peer”.

In di earstn zboa tage  (25 un 26 von prachant) dar trèff bartze haltn nidar in spòrtplatz  “Urbano Nicolussi Castellan” di åndarn drai tage, anvétze, di kunstlar bartn khemmen auvar in gart nidar nåmp in Kulturinstitùt, sèmm boda an sunta di drai in tages bartnda khemmen gezoaget di arbatn un di kunstlar un gespèrrt dar trèff.

Zbisnen in vünf kunstlar zornìrt bartnda soin söttane bodada sa soin gest in di vorgånnatn djar o, azpe dar Corrado Clerici (daz draite mal), di Lidia Rosińska un dar Ugo Carli Castelar (poade vor daz zboate mal). vor da earst bòtta, anvétze, bartnda nemmen toal dar Gianluigi Zeni un dar Manuel Rossi: zboa djunge snitzlar boda sa håm genump toal in ettlane söttane trèff un  boda soin khent hoach geschètzt vodar komisiong. Alle se bartn håm an lèrcharn odar zedran zöll boda iz khennt umgemèkket von birbl Vaia, di zölln bartn soin vo 50 zentimetre bait un hoach an mètro un achtzekh, motosang, segla, ponte un a groaza maistarschaft: di madjì von beldar vo Lusérn bart khearn zo vornaügrase pitt soin naüng protagonìstn.

Übarsetzt von Schaltarle vor di zung von Toalkamou vodar Zimbar Hoacheben

Übarsetzt von Schaltarle vor di zung von Toalkamou vodar Zimbar Hoachebene

Link all’articolo in lingua italiana, pubblicato qualche giorno fa su UT24 https://www.unsertirol24.com/2024/06/26/in-hertz-von-holtz-3/IN HERTZ VO HOLTZ